Тошкент Ботаника боғида Ботаника соҳасига бағишланган музей очилди
Тошкент Ботаника боғида табиат ва ботаника соҳасига қизиқувчи барча учун ноёб музей ташкил этилди. Мазкур музей нафақат ўсимликлар оламини ўрганиш, балки унинг бетакрор жозибасини ҳис этиш учун замонавий шароит яратган.
Музейнинг чап томонида боғда турли йилларда директор лавозимида фаолият юритган ва ботаника соҳасига улкан ҳисса қўшган олимлар ҳақидаги маълумотлар тақдим этилган. Шунингдек, боғ илмий лабораторияларининг фаолияти, уларнинг сўнгги илмий ютуқлари ва касаба уюшмаси томонидан амалга оширилган ишлар ҳақида ҳам батафсил маълумотлар ёритилган.Бундан ташқари, Музейга жойлаштирилган монитор орқали боғдаги фаолиятларни акс эттирувчи видеотасвирлар намойиш этилади.
Ўнг томонида эса турли хил дарахт ва буталарнинг қуриган тўнкалари намойиш қилинган. Шу билан бирга, Ботаника боғи коллекциясида мавжуд бўлган дарахт, бута ва доривор ўсимликларнинг уруғлари махсус идишларга жойлаштирилиб, уларнинг номи учта тилда — ўзбек, рус ва лотин тилларида кўрсатиб қўйилган.
Mazkur muzey maktab o‘quvchilari, oliy o‘quv yurtlari talabalari va botanika sohasiga qiziquvchi boshqa tashrif buyuruvchilar uchun amaliy ahamiyatga ega. Muzeyga tashrif buyuruvchilar Botanika bog‘i faoliyati, o‘simlik urug‘larining turlari va boshqa yo‘nalishlar haqida qimmatli ma’lumotlarga ega bo‘lishlari mumkin.
Ботаника билан қизиқадиганлар учун ушбу музей илмий-амалий билимлар маркази бўлиб хизмат қилади.
